Yagleel

 Yagleel faahfaahin iyo falanqey kooban

 

Sheeko- Faneed ku dhisan tusmeen iyo malo awaal ummadi u aayi lahayd.

 

Guuleed waa hoggaamiyaha sheeko-Tusmeedda Yagleel, waa mufakar iyo hal abuur dhallinyaro ah. Waxa uu ku foogganyahay aas'aasidda bulsho ka duwan tan uu ka dhashay. Ma sahlana in qof dhallinyaro ah maankiisa ka keensado hab-hoggaamin ka duwan tan bulshadiisa iyo dunidaba, waxaase taas ka adag inuu fuliyo. Caqabaddu waa isha hal abuurka e, Guuleed waxaa biritaaray, fakarka iyo halgankana ku dhaliyay caqabadda hor mar la'aaneed ee dalkiisa ka jirto.

 

Far kaliya fool ma dhaqdee, Guuleed waxa uu ka garab helay dhallinyaro ku mabda' ah, waxna isla fahmi karaan. Koox la magac baxday “YAGLEEL” ayeey dhisteen, waana halka magaca buuggu ka yimid. Shuruuc iyo xeer nidaamiyayaal gaar ah ayeey dajisteen, fulintoodana u hal adeegeen. Umadda Soomaalida iyo badiba Afrikaanta ayaa lagu yaqaanaa inay hoggaanka ku wada dhagaane, Yagleel taa way iska ilaaliyeen. Ku haboonaan mooyaane xil jacaylna daaway ka yeesheen.

 

Nidaam dowlad lagasoo amaahday, dad dhaqan ahaan iyo diin ahaanna kaa duwan laga soo waariday hormar lagu ma gaaro. Kooxda Yagleel ayaana abuurtay qaab dowli gaar ah, dalkoodana ku habboon. Dal dagaalo, musuqmaasuq, qabyaalad, sad bursi iyo faquuq kaga haray dunida in la hagaa wax sahlan maahan. Guuleed iyo asxaabtiisa waxay xoogga saareen dhisidda ummad la jaan qaaddo dunida casriga ah, diiraddana  saarto hormarka nolosha qaybeheeda kala duwan.

 

Caqabado qof walba oo dhaqaaq damco hor tuban iyo xalka ugu mudanba waad ku dhex arkaysaa Yagleel. Waxaad gudihiisa ugu tagaysaa go'aamo haddii Soomaalidu qaadato, wax uun ka badali lahaa jahwareerkeeda. Tilaabooyinka ay Yagleel qaadeen badi waxaa dhinac yaal caqabaddii iyo xalkii looga gudbi lahaa. Tijaabadu waa guusha barkeed.

 

Yagleel maahan sheeko-faneed oo kaliya, ee waa buug caqliyeed aan caadifad uun ku dhisnayn. Waxaanse u daynayaa akhristaha ku xeeldheer falkinta sheeko-faneedda. Faa'iidada buugguna waxay ku xirantahay qof walba iyo aqoonta uu u leeyahay kala dhigidda Sheeko-faneedda iyo sida uu uga saaran karo casharada nololeed ee ku jira.

 

Yagleel waa ka kooban 330 Bog hal sheeko ah, mawduuca uu ku qotomo se mudnaa in uu kasii bato. Tiro labaatan qof ka badan ayaana doorar kala duwan qaadanayo. Waana mala awaal sheekada buuggu (fiction story.)

 

Hal ku dhigga Yagleel waa "Marti la maamulo intaad noqon lahayd, noqo madax la maamuuso!)

Madaxdu maahan siyaasi oo kaliya ee qof walba qayb ka noqdo ayaaha ummaddiis, sababna u noqdo dhismaha noloshiisa iyo mustaqbalka kuwa danbe waa madax aan marti cidna kaga noqon nolosha iyo waaqaca bulshadiisu ku sugnayd.

 

Yagleel wuxuu daaran yahay kacdoon bulsho oo ka duwan kacdoonada Soomaalidu taqaan! Waa kacdoon ka guntamaya dhibaatada jirta, xalka dhibaataduna ay tahay hab-hoggaamineed oo laga soo dhirindhiriyey dhaqanka hoggaamineed ee Soomaalida.

 

Ustaad Naima Ali Hassan